Líkur á ofanflóðum í asahláku

Búast má við asahláku er rigning og hlýindi ganga yfir landið á föstudag og um helgina.
Mestri úrkomu er spáð á Ströndum, Norður-, Austur- og Suðausturlandi.
Líkur eru á krapaflóðum og votum snjóflóðum þar sem rignir í snjó.

Spáð er norðaustan hvassviðri og asahláku á morgun, föstudag 31. október, og um helgina. Í dag er víða dálítil él, og snjókoma á köflum suðaustantil, frost 0 til 7 stig. Í nótt á að hlýna og á morgun, föstudag, má búast við hita yfir frostmarki alls staðar á landinu, mest um og yfir 10 stig suðaustanlands. Hlýindunum fylgir úrkoma í formi rigningar á láglendi, en slyddu eða snjókomu efst til fjalla. Úrkoman nær yfir vítt svæði, frá norðanverðum Vestfjörðum og að Suðausturlandi. Mestri úrkomu er spáð á Ströndum, Norðurlandi, Austfjörðum og Suðausturlandi.

Snjóað hefur í vikunni og er fannhvíta jörð að sjá víða. Þar sem snjór er í bröttum brekkum geta lítil vot snjóflóð fallið þegar hlýnar skarpt og rignir, og krapaflóð geta fallið þar sem snjór er í vatnsfarvegum.

Líkur á krapaflóðum og votum snjóflóðum geta aukist á meðan veðrið gengur yfir, sérstaklega á Suðausturlandi, Austfjörðum, Norðurlandi og Ströndum. Ekki er talið að hætta skapist í byggð en Ofanflóðavakt Veðurstofunnar fylgist vel með aðstæðum.