Snjógryfjur í Eyjafirði

Fimmtudaginn 30. október voru gerðar tvær snjógryfjur í Eyjafirði; önnur í Hlíðarfjalli og hin í Öxnadal. Báðar sýna fremur þunna snjóþekju.

Gryfjan í Hlíðarfjalli var gerð í um 570 m hæð í SA-vísandi brekku í um 32° halla. Dálítill skafrenningur var á svæðinu. Heildar snjódýpt var um 55 cm. Gryfjan sýnir vindniðurbrotinn snjó (vindfleka) ofan á nýsnævi. Við jörð var þunnt lag af köntuðum kristöllum. Gryfjan sýnir háan hitastigul á köflum. Samþjöppunarpróf gaf ekkert brot.

Gryfjan í Öxnadal var gerð í um 500 m hæð í S-vísandi brekku í um 29° halla. Heildar snjódýpt var aðeins um 20 cm og var snjóþekjan einsleit með nýsnævi. Mjög hár hitastigull var í gryfjunni. Samþjöppunarpróf gaf ekkert brot.