Horfur vegna sólmyrkvans miðvikudaginn 12. ágúst

Í dag er lægð rétt suður af Reykjanesi og veðraskil hennar fara yfir stærstan hluta landsins. Í framhaldinu er útlit fyrir að lægðin þokist austur með suðurströndinni. Úrkoma verður einkum bundin við sunnanvert landið en úrkomuminna á Breiðafirði og Vestfjörðum fram undir kvöld, en skilin virðast þá ætla að ganga yfir. Því verða líklega mestar líkur á að skýjahulan brotni upp á því svæði í kringum sólmyrkvann. Fyrir norðan verður þurrt fram eftir degi. Hér neðst má finna nákvæmari veðurspár fyrir hvert spásvæði á vesturhluta landsins, m.t.t. sólmyrkvans. 

Í líkönum Veðurstofunnar er að finna þrenn skýjalög, há- mið- og lágský. Háský hafa lítil áhrif á sólmyrkvann þar sem sólarljós á frekar auðvelt með að brjótast í gegnum þau. Í gegnum þau sjáum við t.d. rosabaug.  Miðskýin hleypa minna í gegnum sig en alls ekki útilokað að hægt sé að njóta sólmyrkvans. Ef lágskýjasvæði liggur yfir eru líkurnar hins vegar litlar á að eitthvað sjáist til sólar. Myrkvans verður samt vart í slíkum aðstæðum.  

Heildarskýjahulan gefur til kynna að nánast verði alskýjað yfir landinu kl. 18 (græn mynd) en göt á lágskýjahulu eru líklegust við Breiðafjörð og á Vestfjörðum. Á suðvesturhorninu er útlit fyrir óstöðugt loft og skúri. Það þýðir að inn á milli skúra getur sést til sólar og með heppni geta slík göt hitt á sólmyrkvann.

Efri myndin er frá nýjustu keyrslu IG-háupplausnarlíkansins, en neðri sýnir DINI-háupplausnarlíkanið.

Almennt eru skýjahuluspár þær afurðir sem hvað erfiðast er að reikna þar sem eðlisfræðin á bak við þær er mjög flókin. Því ber að taka svona smágötum með fyrirvara. Spárnar gefa frekar til kynna að göt gætu myndast í skýjahulu á svæðinu og ekki er hægt að staðsetja þau nákvæmlega.  

Spáin fyrir allt landið á miðvikudag er svohljóðandi:  

Austlæg átt 5-13 m/s, hvassast við suðurströndina. Rigning eða skúrir, en úrkomuminna á norðanverðu landinu fram eftir degi. Hiti 10 til 20 stig, hlýjast fyrir norðan.  

Úrkomuspákort hér fyrir neðan frá IG og DINI, háupplausnalíkönum Veðurstofunnar, sem gilda kl. 18 á miðvikudag sýna hvar rigning muni falla og umfang svæðisins, og aftur sést að erfitt er að meta nákvæma staðsetningu.

Veðurhorfur á almyrkvaslóðum   

Höfuðborgarsvæðið  

Fremur hæg austlæg eða norðaustlæg átt, skýjað og skúrir. Möguleiki er á að göt myndist á milli skúra svo hægt sé að sjá sólmyrkvann, en það eru ekki miklar líkur.

Reykjanesskaginn  

Svipað útlit og með höfuðborgarsvæðið, norðaustlæg átt og skúrir Ekki miklar líkur á að göt myndist í skýjahuluna.  

Snæfellsnes   

Austanátt og líklega skýjað, en skúrir. Þar sem skilin eru seinnilega að leysast upp í kringum sólmyrkvahámark eru líkur á að lág- og miðskýjahulan brotni upp á stöku stað.  

Vestfirðir 

Fremur hæg norðaustlæg átt og skúrir á stöku stað. Útlit fyrir háský. Brotin lágskýjahula vestantil og líkur á götum í miðskýjum, einkum norðvestantil. Einhverjar líkur eru á að sjáist til myrkvans á þessum slóðum.