Spá gerð kl. 23 þriðjudaginn 11. ágúst, tæpum 19 klukkustundum fyrir almyrkvann

Spá gerð kl. 23 þriðjudaginn 11. ágúst

tæpum 19 klukkustundum fyrir almyrkvann

Á miðvikudag er gert ráð fyrir að lægð komi upp að sunnanverðu landinu. Nýjustu veðurlíkanakeyrslur reikna með að hún verði skammt suður af Reykjanesinu síðdegis á miðvikudag og fari veðraskil hennar yfir stærstan hluta landsins. Síðan er útlit fyrir að hún þokist austur með suðurströndinni í framhaldinu. Úrkoma verði einkum bundin við sunnanvert landið en úrkomuminna í Breiðafirði og á Vestfjörðum fram undir kvöld, en skilin virðast þá ætla að ganga yfir. Því verða líklega mestar líkur á að skýjahulan gæti brotnað upp á því svæði í kringum sólmyrkvann. Einnig verður lengst af þurrt norðanlands fram eftir degi. Hér neðst má hins vegar finna nákvæmari veðurspár fyrir hvert spásvæði á vesturhluta landsins, m.t.t. sólmyrkvans.

Nú eru flest líkön komin með lægðina á svipaðar slóðir og því talsverðar líkur á að við séum að nálgast rétta staðsetningu lægðarinnar. En þó er einhver óvissa um umfang skilanna, þ.e. hvenær, hve mikið og hve langt skilin ganga til norðurs upp eftir Faxaflóa. Það mun hafa mikið að segja hve vel eða hvort eitthvað muni sjást til sólmyrkvans, einkum norðvestanlands.

Í háupplausnarlíkönum Veðurstofunnar eru að finna þrenn skýjalög, há- mið- og lágský. Háský hafa lítil áhrif á sólmyrkvann þar sem sólarljós á frekar auðvelt með að brjótast í gegnum þau. Miðskýin hleypa minna í gegnum sig en alls ekki útilokað að hægt sé að njóta sólmyrkvans. Ef hins vegar liggur lágskýjasvæði yfir eru líkurnar hins vegar litlar á að eitthvað sjáist til sólar eða myrkvans.

Heildarskýjahulan gefur til kynna að nánast verði alskýjað yfir landinu kl. 18 (græn mynd) og tildæmis eru litlar líkur á að skýjahulan brotni upp á suðvesturhorninu. Hins vegar er að sjá að lágskýjamyndin er fremur brotin sums staðar vestan- og norðvestanlands, en þó einkum á Vestfjörðum. Mið- og háský sýna göt á svipuðum slóðum en ekki á alveg sömu stöðum. Efri myndin er frá nýjustu keyrslu IG-háupplausnarlíkansins, en neðri sýnir DINI-háupplausnarlíkanið, og þar sést að staðsetning gata í skýjahulu er enn á reiki þar sem líkönin eru ekki alveg sammála.

Fjögur skýjahulukort af Íslandi úr IG-háupplausnarlíkaninu, gild kl. 18 miðvikudaginn 12. ágúst. Heildarskýjahula nær yfir nær allt landið, en göt sjást í lágskýjahulunni, einkum á Vestfjörðum og norðanlands. Mið- og háskýjahulan er rofin á öðrum stöðum, einkum sunnan- og austanlands. — Skýjahula úr IG háupplausnarlíkaninu, nýjasta keyrsla frá kl. 18 þann 11. ágúst.

Fjögur skýjahulukort af Íslandi úr DINI-háupplausnarlíkaninu, gild kl. 18 miðvikudaginn 12. ágúst. Heildarskýjahula nær yfir nær allt landið, en víða eru göt í lágskýjahulunni á Vestfjörðum og norðanlands. Miðskýjahulan er rofin á stöku stað austanlands og stór göt eru í háskýjahulunni yfir austan- og suðaustanverðu landinu. — Skýjahula úr DINI háupplausnarlíkaninu, nýjasta keyrsla frá kl. 18 þann 11. ágúst.

Almennt eru skýjahuluspár þær afurðir sem hvað erfiðast er að reikna þar sem eðlisfræðin á bak við þær er mjög flókin. Því ber að taka svona smágötum með fyrirvara. Spárnar gefa frekar til kynna að göt gætu myndast í skýjahulu á svæðinu og ekki er hægt að staðsetja þau nákvæmlega.

Spáin fyrir allt landið á miðvikudag er svohljóðandi:

Austan og norðaustan 3-10 m/s, en heldur hvassara með suðurströndinni. Víða skýjað og skúrir eða rigning með köflum, en dregur úr úrkomu norðvestantil um kvöldið. Hiti 8 til 18 stig, svalast við norður- og austurströndina.

Úrkomuspákort hér fyrir neðan frá IG og DINI, háupplausnalíkönum Veðurstofunnar, sem gilda kl. 18 á miðvikudag sýna með mun meiri nákvæmni hvar rigning muni falla og umfang svæðisins, og aftur sést að erfitt er að meta nákvæma staðsetningu. Mestar líkur á að skýjahulan brotni upp eru þó enn í kringum Breiðafjörð og þá sérstaklega á Vestfjörðum.

Kort úr IG-háupplausnarlíkaninu sem sýnir úrkomu, vind og loftþrýsting yfir Íslandi kl. 18 miðvikudaginn 12. ágúst. Víðáttumikið úrkomusvæði liggur yfir sunnanverðu landinu og úrkoman er mest við suðurströndina og suðvestanlands. Minni og dreifðari úrkoma er vestanlands, en að mestu þurrt á Vestfjörðum og norðanlands. Austan- og norðaustanátt er ríkjandi, hvössust með suðurströndinni. — Úrkoma og vindur í IG háupplausnarlíkaninu, nýjasta keyrsla frá kl. 18 þann 11. ágúst.

Kort úr DINI-háupplausnarlíkaninu sem sýnir úrkomu, vind og loftþrýsting yfir Íslandi kl. 18 miðvikudaginn 12. ágúst. Víðáttumikið úrkomusvæði liggur yfir sunnan- og suðvestanverðu landinu, með mestri úrkomu við suðurströndina. Dreifðari úrkoma er vestanlands og inn til landsins, en að mestu þurrt á Vestfjörðum og norðaustanlands. Austan- og norðaustanátt er ríkjandi, hvössust með suðurströndinni. — Úrkoma og vindur í DINI háupplausnarlíkaninu, nýjasta keyrsla frá kl 18 þann 11. ágúst.

Veðurhorfur á almyrkvaslóðum

Höfuðborgarsvæðið

Fremur hæg austlæg eða norðaustlæg átt, skýjað og skúrir, en samfelldari rigning um tíma undir kvöld og dregur síðan úr úrkomu. Ekki miklar líkur á að göt myndist í skýjahuluna í kringum sólmyrkvann.

Reykjanesskaginn

Svipað útlit og með höfuðborgarsvæðið, norðaustlæg átt og skúrir, samfelldari rigning um tíma undir kvöld og dregur svo úr úrkomu. Ekki miklar líkur á að göt myndist í skýjahuluna.

Snæfellsnes

Austanátt og yfirleitt þurrt fram yfir hádegi, en rigning með köflum eða skúrir eftir hádegi. Líklega skýjað, en þar sem skilin virðast vera að leysast upp í kringum sólmyrkvahámark eru líkur á að lág- og miðskýjahulan brotni upp á stöku stað í kringum Breiðafjörð fram undir kvöld.

Vestfirðir

Fremur hæg norðaustlæg átt og skýjað að mestu. Lengst af þurrt, en skúrir á stöku stað undir kvöld og bætir heldur í úrkomu seint um kvöldið. Útlit fyrir háský, Ekki mikið um lágský, helst vestantil, og líkur á götum í miðskýjum, einkum norðvestantil.

sólmyrkvi

Bústaðavegi 7-9, 105 Reykjavík

Sími: 522 6000